新西兰 160 米深谷荡韆鞦! 嗌爆玻璃 3大设施玩命之旅

2020-07-13

当我第一次知道要跳那个「玩命韆鞦」的时候，其实我是拒绝的！因为我觉得⋯⋯不能叫我跳、马上跳，第一，我要试一下！你拍完以后加了很多特技，那韆鞦弹啊⋯⋯ 很远！很高！很正！结果读者出来一定骂我，根本没有这种韆鞦！放心！记者亲身试完，何止唔「流」，直头失魂断片！新西兰本应是乐山乐水的度假胜地，烂玩如我偏向险中行，精选3个世界之最，包括最大峡谷韆鞦、最斜生态飞索以及最长草地飞球，肾上腺素负荷飙顶！勇士们，有心理準备玩命未？

嗌爆玻璃榜首！ 160 米深谷荡韆鞦？

论新西兰的玩命教主，当然是笨猪跳始祖公司AJ Hackett，但记者略嫌笨猪跳的传统失重体验唔够惊喜，而且高度只屈居全球第三，去澳门跳好过！千里迢迢嚟到梗係斗最大，离地160米的峡谷韆鞦听落就啱数，仲有得孖公仔齐齐跳，尖叫分贝双倍上！从皇后镇市区乘40分钟车程，峡谷口属闲「车」止步，穿过摇摇曳曳的吊桥赴「刑台」，脚步突然好沉重！步入跳台，被壮观的深谷吓到飙马尿之际，工作人员已用安全带繫实我下盘，準备上吊吧！望住身边素未谋面嘅职员，即将成为我跳崖嘅生死之交，玩过不下廿次嘅佢，睇怕感受唔到我内心嘅忐忑。「你哋想倒数定我直接揿掣？」殊不知一答「Count-down 呀呀呀！！！（回音）」就笔直急坠深谷，又话有得拣嘅，你呃人！

胆生毛记者 Nicole：之前喺澳洲大堡礁玩过高空跳伞，今次被指派挑战三项极限任务，有命回来写稿嘅感觉真好！

Round One

最高时速：120km/hr

全程历时：25秒

惊吓度：

所谓韆鞦係用安全带如尿布般包住两边盘骨，将失重一刻的束缚感减到最低，进行两次安全检查后就準备就绪！

高空凌迟边缘

等待永远都係最漫长嘅，悬吊在半空已经唔好受，仲要轮流向3部官方摄影机Say Cheese 留倩影，你畀我死吧啦……

影完未呀？速战速决啦!

稍为鬆懈就嚟料，跌坠一下嗌破喉咙，就算係经验老到的陪玩职员都要紧闭双眼！

多谢公司！（泪）

笨猪跳纯属自愿，韆鞦却是将处决大权交託畀工作人员，睇下旁观的花生友几招积！

中伏了！

高手过招！

普通跳崖已经满足唔到一班地球人，嫌向前或背向Fing未够过瘾？双人花式变化多到你估唔到！只要你敢试，工作人员无任欢迎！呢班死侍将「笑看人生」嘅态度发挥得淋漓尽致，好值得大家学习！

倒头舂

情侣互骑

你上我下

贴屁股 hehe

面容扭曲！ 25秒生死时速

知道要出镜，出发前左谂右度，究竟应该用咩表情跌落去？赛后检讨，呢个考量绝对係多余，面对时速120公里嘅极速空降，相当于驱车驰骋高速公路，甚至超越陆上最快、全速奔驰的猎豹，个脑一片空白嘅我只能够「劏猪喊惊」！头4秒的电光火石间Free Fall 70米，由于背向峡谷，毫无心理準备之下无端端双脚朝天，脑充血呀！坠到最低点开始钟摆向后，离心力些微缓和，直至荡到U 形的对面高位，释怀到失控爆笑，紧张咗成朝终于鬆一口气啦！

好惊呀妈～

超大风！

忽然头着地

準备回弹

后滚翻～

: 心有余悸

死后感言

玩完感觉重生，行步路都自觉身轻如燕！第一次上吊时惊到面无血色，突如其来的跌荡吓得我缩埋一嚿，自拍失败！克服恐惧体会到个快感有几正，即刻唔介意跳多次，誓要影倒为止！

连厕所位都係倒吊公仔，搞笑！

Check-in 柜位的墙上写满遗言……

Danielle（左）:试匀向前同后倾两款，当係热身，晏啲仲要玩Skydive呀！ Meredith（右）：啱啱玩完笨猪跳都未回气，就过嚟跳Swing喇！对我嚟讲，笨猪跳靠个人意志「自杀」，更有心理包袱！

Nevis Swing Queenstown

地址： Station Building, Corner of Shotover and Camp Street, Queenstown

电话：+64-（0）800-286-4958

营业时间：星期一至日7:45am-8pm

价钱：（单价）双人跳每人NZD175/HK$926 （留念相片及影片需另加NZD80/HK$423）

交通：从皇后镇乘40分钟穿梭巴至峡谷跳台，每日运作时间为9:20am-2:40pm。

网上报名

化身泰山一啸怒冲790米！

留守皇后镇市区，走唔甩搭吊车上海拔790米的山顶饱览市景，至于回程，我拣用自己方法飞落山！Zipline 愈嚟愈普及，源自加拿大的Ziptrek 加入行山元素，刺激之余更耗体力！最长的钢索虽然留守起源地，但最斜的生态飞索就落在新西兰Bob’s Peak！得天独厚嘅打卡位莫过于我身后的Lake Wakatipu 湖景，不自控地360度旋转包保无死角，脚揈揈凌空歎景确係爽！原本只需10分钟的缆车路程，改为自行充当「人肉吊车」Z 形瀡落山脚，变相用咗3个钟，实不相瞒，我呢只「无脚雀仔」都飞到虚脱！

Round Two

最高时速：70km/hr

全程历时：3小时

惊吓度：

教练指倒挂窍门在于把重心坐低，双腿登直提高，双手则捉实吊索最低点，记者宣告挑战失败！

标準倒挂金鈎！

飞翔期间滑轮会不断陀螺式旋转，想停定一边看风景都有难度，睇摄影师对脚就知转得几头昏脑胀喇！坚离地！3小时飞翔消耗战

全长950米的路程分成6段，恐怖度由浅入深，速度感虽然不及Swing，但高度足以吓到脚仔软！仲要鼓起勇气跳六次，你都咪话唔攞命！高海拔的清新空气，加上一次又一次心跳加速的飞身，子弹般穿插绿意盎然的树丛，举头巨木参天，浩瀚绝景嘅张力将畏高心情抹得一乾二净！最尾一段斜度达40°，据说是全球最斜的吊索纪录，时速达70公里，难怪树林传出哀嚎惨叫！历程3个钟实在长到不可思议，但成功用「空中飞人」姿态征服790米峭峰，确係令人飘飘然嘅！

新西兰每日的天气变化甚大，时晴时雨，试玩当日就有幸目睹雨后彩虹！

第N跳

一飞沖天！

死后感言

虽然路程分为初级和进阶版，前者玩少一个钟相对轻鬆，但就错过咗湖景位同滑得最快的一段，再拣我都会一气呵成碌落山脚！来自荷兰的教练Inge好鬼马，隔个路段就教新招，如倒立、Trust Fall般向后瞓等，3小时全无闷场！

连教练同行13人，每段吊索都要等齐人先继续，尾二站更需步行20分钟，山路颇陡峭，完成后我成身散晒！

相对其他极限运动算合家欢喇，教练仲会讲解生态保育同可持续生活等，有得玩又有嘢学！Renee （中国游客）

山上平均气温低几度，记得着多几件衫保暖，行装最紧要轻便，因为我哋要帮大家孭足全程㗎！Igne & Chris（教练）

防跌手机必备！即场测试过，点Fing都唔甩落，NZD15/HK$79抵畀！

Ziptrek Ecotour

地址：45 Camp St, Queenstown

电话：+64-（0）3-441-2102

营业时间：星期一至日 8:30am-6pm

价钱：（ 4段路线）NZD85/HK$450、（6段路线）NZD135/HK$714

交通：乘Gondola吊车至山顶，步出商场后向左走100米。

网上报名

海啸级肉搏！称霸全球仓鼠跑

平时睇仓鼠跑滚轮好可爱，但原来换转人类设身处地係会崩溃㗎！源起自新西兰嘅透明大弹波，前年网上疯传一条参加者集体狂奔被辗的短片，立即心郁想碌埋一份！目前纽国只有距奥克兰3小时车程的罗托鲁瓦有得玩，记者仲唔乘机拜会发明呢个变态Game 嘅创办人真身，再即席试玩全球最长轨道，滑水暴走350米！临场仰望草坡的庞大规模，直径3.2米嘅巨波弹住落山，透出两个左右摇晃的鬼影，不禁想缩沙走人……可惜我不入地狱谁入，工作人员爽手注水开闸，我就开始喺里面飞弹，汹涌水花扑面，双眼淹水完全擘唔开，颠簸的弯路跌碰足足3分钟，想收买人命咩！

Round Three

最长跑道：350米

全程历时：3分钟

惊吓度：